ازاى تفوز في التفاوض ( نصائح من القرآن والسنة )

أزاي تفوز في التفاوض ( نصائح من القرآن والسنة )

السلام عليكم، في السلسلة دي، هشارك معاكم نصائح فى البيزنس وربطها بالقرآن والسنة والهدف من الموضوع أننا نرتقى بمعاملاتنا في البيزنس وتحرى الحلال والحرام, وأن يكون في مرجع ديني.

أزاي تفوز في التفاوض

النبي صلى الله عليه وسلم قال: “من كان يؤمن بالله واليوم الآخر فليقل خيرًا أو ليصمت” يعني لازم يحافظ على الصمت معظم الوقت وما يتكلمش إلا لما يكون لازم يتكلم, ويطلب منه الكلام, لو مفيش داعي للكلام يبقى نصمت, وهنا السر فى التفاوض ( الصمت ).

ليه الصمت مهم؟

كتير من رواد الأعمال بيقعوا في غلطة شائعة، وهي إنهم بيتكلموا كتير, ( وأنا كنت واحد منهم ) سواء في اجتماعات العملاء أو مع الزملاء أو حتى مع الأصدقاء, بيعتقدوا إن كل ما بيتكلموا أكتر بيظهروا أذكاء أكتر، لكن ده غلط كبير, لما تكون الشخص اللي بيتكلم طول الوقت، بتعرض نفسك لخطر قول حاجات مش مهمة أو مش ملائمة، وبتفصح عن معلومات مفيش داعي لمشاركتها, ممكن اللي قدامك يمل أو تقول حاجة مسيئة من غير ما تقصد.

النبي صلى الله عليه وسلم قال: “مَن صَمَتَ نَجا” (رواه الترمذي), يعني إن اللي بيصمت بينجو من المشاكل والمواقف المحرجة.

أهمية الاستماع

الكلام الكتير يعني كمان إنك مش بتقوم بوظيفة مهمة جدًا وهي الاستماع, لما بتتكلم كتير، بتفوت تفاصيل ومعلومات ونقاط مهمة, القرآن الكريم بيأكد على أهمية الاستماع في سورة الزمر: “الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ أُولَٰئِكَ الَّذِينَ هَدَاهُمُ اللَّهُ وَأُولَٰئِكَ هُمْ أُولُو الْأَلْبَابِ” (سورة الزمر، الآية 18).

قصة من القرآن

قصة سيدنا يوسف عليه السلام تقدم مثالًا رائعًا على فن التفاوض, عندما كان يوسف عليه السلام في السجن وفسر رؤيا الملك، لم يطلب الإفراج الفوري عنه, بل انتظر حتى يستدعيه الملك بنفسه، ثم فاوض بذكاء على شرط الإفراج عن جميع المتهمين وإثبات براءته (سورة يوسف، الآيات 43-54).

قصة من الحياة الواقعية

خلوني أحكيلكم قصة, السنة اللي فاتت، كنت أنا وصديق وبنعمل شغل مع بعض بنتفاوض مع عميل كبير, استمرت المفاوضات لشهور, وفي الآخر، العميل طلبنا لاجتماع.

في الاجتماع ده، العميل فضل ساكت لمدة ساعة وأكثر من غير ما يقول كلمة واحدة, في الآخر، لما اتكلم، كلماته كانت قليلة لكن أول ما اتكلم قعدنا نتفاوض لحد ما وصلنا لسعر أقل بكتير من اللى كونا متوقعينه وقبلنا العرض.

والصفة دى تقريبآ مشتركة فى كل رواد الأعمال اللى عندهم بيزنس بملايين قعدت معاهم, ومن أسبوع فات كنت مع شخص عنده بيزنس كبير كانت صامت لكن أنا فهمت الموضوع خلاص وبدأت أسكت أو اسأل اسئلة تخليه يحكى كتير علشان أعرف منه معلومات أكتر واقدر اقدم له عرض مناسب وبارضوا قدر يتفاوض معى فى حوالى 20% من المبلغ اللى كنت متوقعه, وأنا قدرت أزود 20% عن المبلغ اللى هو كان متوقعه.

خطوات عملية لتطبيق الصمت والفوز بالتفاوض

1. في أي اجتماع، خليك آخر واحد يتكلم, اسمع وراقب وجمع معلومات, زي ما قال النبي صلى الله عليه وسلم: “لَيْسَ الْخَبَرُ كَالْمُعَايَنَةِ” (رواه ابن ماجه), يعني اللي يشوف ويلاحظ بنفسه غير اللي يسمع بس.

2. درب نفسك على مقاومة الرغبة في الكلام, لما تتكلم، خلي كلامك هادف, زي ما قال النبي صلى الله عليه وسلم: “إِنَّ الرَّجُلَ لَيَتَكَلَّمُ بِالْكَلِمَةِ مِنْ رِضْوَانِ اللَّهِ مَا يَظُنُّ أَنْ تَبْلُغَ مَا بَلَغَتْ، فَيَكْتُبُ اللَّهُ لَهُ بِهَا رِضْوَانَهُ إِلَى يَوْمِ يَلْقَاهُ” (رواه البخاري).

3. حاول تبقى معروف بالشخص الهادئ والمتأمل, لما تبقى معروف بالشكل ده، الناس هتحترم رأيك وهتقدر كلامك, زي ما قال النبي صلى الله عليه وسلم: “إِنَّ الْعَبْدَ لَيَتَكَلَّمُ بِالْكَلِمَةِ مَا يَتَبَيَّنُ فِيهَا، يَزِلُّ بِهَا فِي النَّارِ أَبْعَدَ مِمَّا بَيْنَ الْمَشْرِقِ” (رواه البخاري).

الخلاصة

الصمت ممكن يخلينا قادة أفضل ومستمعين أفضل ومفاوضين أفضل, خلونا نستخدمه ونعمل بيه علشان نرفع مستوى شغلنا ونتقدم كرائدين أعمال.