عايز تحسن روتين حياتك وتعمل حاجه جديدة؟
طب هي أسطورة الروتين اللي كل الأغنياء اتبعوه حقيقي ولا لا؟
نفسك تعمل حاجه مفيدة لصحتك ونفسيتك جنب شغلك وخايف ما تعرفش تستمر؟
طب هو بجد في روتين لكل الناس الناجحة؟ وبيكون مجرد روتين بس ولا في حاجات تانية؟
في المقال ده هنتكلم عن:
- حقيقة الروتين.
- الفرق بين الروتين والرتابة.
- أنت السر.
- النجاح والاستمرارية.
- كسر القاعدة.
فيه ناس ناجحة حوالينا كتير بمجهودهم وقدراتهم، وده بيخليهم مثل أعلى لفئة كبيرة من الناس وخاصة الشباب، لأن المرحلة العمرية دي بتكون مطموسة الهوية ولسه بتحاول تكتشف هي شاطره في إيه، عشان كده بينجرف ورا الأساطير اللي من نوعية ازاي تكون مليونير في أقل من سنه وأهداف المليونيرات وكيف تكون غني في تسع خطوات وكلام من ده كتير،
وحتى لو فيه فعلا خطوات فده مش بيكون سر الخلطة ده بيبقى مجرد عمل إنساني مبذول عليه وقت وجهد وطاقة، وعشان بيكون مشترك بين أكثر من شخصية ناجحة ومرموقة بيتحط بين قوسين، ومن هنا تبدأ الدعاية الإعلامية اللي من نوعية بيع الكلام، وأنا هنا علشان أتكلم في الخطوات المفيدة والعملية بدون مبالغة، زي ما بيقولوا “زتونة الحوار”.
حقيقة الروتين
محدش بيحب الروتين بطبيعة الحال فهو غير مرغوب عند كل الناس ومخالف للطبيعة البشرية المفضلة للتجديد، ولكن نفس الناس دول برده بيكون عندهم استعداد يمشوا على الروتين ده ويخلوه جزء من حياتهم ويحبوه كمان لو هيخليهم من قائمة المليونيرات.
وده مش تناقض بالمفهوم الصريح بالعكس حاجه كويسه أن الإنسان يكون في عنده استعداد أنه يغير في شخصيته في سبيل تحقيق أحلامه، ولكن لازم يكون في درجة من الوعي يفهم معها الشخص أن الروتين لو ما كانش في حاجه مفيده هيتحول لنوع من الملل وممكن يعمل أمراض نفسية بدون مبالغة،
وأن كل الشخصيات الناجحة دي عندها المقاومات اللي ساعدتها على النجاح ولو كان في حاجة فعلا في حياتهم اسمها سر، فهيكون مجرد شيء عادي بسيط يقدر أي شخص إنه يعملها عشان يحسن من نفسه، باختصار الأسرار دي مش مصباح علاء الدين ولا مغارة علي بابا اللي هتخليك غني في لمح البصر، بس هتقدر تساعدك من نواحي تانية وتعينك على تقبل الخسائر وتدفعك نحو أهدافك وده أفضل مليون مرة من المصباح والمغارة.
الفرق بين الروتين والرتابة
الروتين في الحياة عبارة عن لغم جاهز للانفجار في أي لحظة، وده للأسف ناس كتير ما تعرفش عنه حاجه، فبمجرد ما يكون في حياتك عاده يوميه حتى ولو كانت الاسترخاء أو ممارسة أي نوع من أنواع الرياضة هتبدا تدخل في دائرة الروتين وهنا الدايرة دي بالتدريج هتكون مركز حياتك لو متعاملتش معها بحرص وحذر هتقدر في لحظه أنها تبوظلك كيانك،
لو على الصعيد النفسي ممكن تصبح مريض بالتوتر أو القلق حتى إن الأمر ممكن يوصل للاكتئاب وده طبعا الجانب السلبي في الموضوع، بينما الجانب الإيجابي في الروتين أنه يبقى جزء من اليوم واليوم يكون ناقص من غيره، زي مثلا تعودك شرب كوباية شاي بعد الأكل لو مشربتهاش هتصدع لأنها بقت جزء منك.
والروتين للمشاهير بعيد كل البعد عن الرتابة والملل المعروفين باسم الروتين، لأن أغلبية الخطوات المشتركة اللي عند الناس دول هتلاقيها زي التأمل والمشي والجري ولعب رياضة معينة وهكذا، فكلها حاجات إيجابية في الأصل والروتين معاها كان شيء مثمر للغاية، ولكن الرتابة بتنشأ من التعود بالإجبار وبتكون نتيجة للروتين الغير محبوب، عشان كده أحب اقولك أن الروتين الفعلي لأي حد هو عبارة عن عادات جميلة للصحة النفسية والبشرية، وده اللي يستحق السؤال عنه وتقليده.
أنت السر
لو بتدور على أسرار النجاح في حياة شخص ما وليكن محمد صلاح مثلا هتلاقي إن نفسه هي السر بعينه، قدر يشتغل على نفسه ويطور من نفسه ويعلم نفسه ويدرب نفسه… إلخ،
فهتلاقي إن كل الجمل الإيجابية عائدة على ذاته وشخصيته يعني هو مخترعش حاجه جديدة في الكون، هو بس عرف يتعامل مع الروتين بشكل صحيح للغاية زيه زي المليونيرات والناجحين كلهم.
ومش معنى كده إن النجاح بيجي بشوية عزيمة وإصرار بس، لأن الحاجتين دول كمان هيطلعوا من شخصيتك ونفسك وعلى الشط التاني من بحر أحلامك هتلاقي ناس ناجحة بطريقتها وأسلوبها، لأن التقليد أو المشي على نفس الخطوات هيوصل معاك لحد معين ويقف ويسيبك تكمل بأسلوبك أنت وبطريقتك وفي ايدك أحلامك وبتجدف بشخصيتك وعقلك محدد أهدافه.
النجاح والاستمرارية
الاستمرارية في حد ذاتها نجاح، والنجاح مش هيكون نجاح من غير استمرارية السعي يعني المصطلحين هم طرفين الحبل.
فلو مثلا قررت أنك تعمل تمارين ريلاكسيشن عشر دقايق كل يوم وعملتها فعلا فتبقى نجحت، ولكن لو استمريت هتبقى نجحت فعلا وهنا المعنى واضح وصريح وبيبين مدى علاقة المصطلحين ببعض، وهكذا على كافة الأمثلة من العادات الصحية اللي هتفيدك في بيتك وشخصيتك ودائرتك الاجتماعية.
هنا أقدر أقول لك إن الخلاصة هي أنت فأنت عشان تنجح وانت عشان تستمر وانت عشان توصل وانت عشان كل حاجه، وده هيبان جدا في الطرق والعادات اللي هتعملها عشان أنت تفيد نفسك.
ومن أهم العادات عند الناس الناجحة هي المشي في الطريق اللي هيخليهم يكتسبوا معلومات زي مثلا قراءات عدد محدد من الصفح يوميا، وكمان الحاجات اللي هتخليهم يحسوا باستقلاليتهم وحريتهم حتى ولو كانت تحضير الأكل بنفسهم أو ترتيب دولابهم وسريرهم، بالإضافة طبعا إلى المحافظة على الصحة زي المشي كل يوم لمدة ساعة أو خسارة وزن أو تناول أطعمة مفيدة والبعد عن الدهون، وكمان ممكن تكون شرب الشراب المفضل أو تناول طعام لذيذ مع أصدقاء كويسين وناس بينهم علاقات وطيدة وهكذا..
كسر القاعدة
روتين الناجحين عمره ما كان قاعدة لازم تمشي عليها، هو بس عبارة عن إشارة للمكان الصحيح في حياتك عشان تنوره وتنور بيه، لو قدرت توصل للنور ده جواك يبقى تمام، ولو ما قدرتش ممكن يكون نورك في مكان تاني في شخصيتك،
عشان كده لازم تكسر القاعدة، القاعدة عمرها ما كانت في أكل أو شرب معين أو طريقه لبس أو أماكن خروج أو كتب بعينها، وحتى لو عملت كل الخطوات الصحية عشان تبقى شخص بيشبه في أسلوب حياته بالمشاهير والناجحين هترجع تاني تدور على قاعدة تناسب إمكانياتك،
عشان كده لازم من البداية انت اللي تحط القاعدة مش العكس لان انت اللي أدرى بنفسك من مليون كتاب ممكن تقرأه يكلمك عن روتين للمليونيرات، لان هنا القواعد بتختلف بناء على اختلافات الشخصية والقدرات والإمكانيات المادية والزمنية كمان، علشان كده أسطورة كيف تكون مليونير في كم شهر أو ازاي تتعلم فن جمع الأموال كل دي عبارة عن شعارات بتلعب على نقط ضعف عند الناس لأن ما فيش حد يكره أنه يكون غني أو محبوب ومشهور، ولكن بردو مافيش حد يحب إنه يتكلف فوق طاقته أو يتحط في قالب بدني ونفسي وفكري هو مش متقبلة.
