كيف تبيع كورساتك عبر الإنترنت إذا لم يكن لديك أموال للإعلانات!

إذا أنت متخصص في مجال معين وعايز تفيد بيه الناس من خلال الدورات؟
ونفسك يكون ليك دخل مادي ثابت كثمرة مجهودك في الحصول على المعلومات اللي بتقدمها؟

لكن بسبب قلة الفلوس اللي معك حاسس انك مش هتعرف تعمل حاجه؟

وخايف تصرف الفلوس اللي معك أصلا في غير مكانها الصحيح؟

هنا هنتكلم بشكل مفصل عن:

1. هعرفك على نفسك وإمكانياتك عشان تقدر تستخدمها صح.
2. هعرفك سياسة وحقيقة الدورات عبر الإنترنت.
3. هفهمك أهمية الإعلانات.
4. هديك بدائل سريعة بس مش سهلة.

من حقك إنك تبدأ الكورس أو التدريب أو المحتوى اللي انت عايز تقدمه بشكل لائق بقيمة التكنولوجيا والتقدم اللي احنا فيه، ولكن في شوية مشاكل لازم تواجهك أنت وأي حد لسه بيبدأ ومنها طبعا قلة الفلوس وكمان إبهام شخصيتك للناس كلها، فبالطبع مش هتلاقي في الأول الترحيب اللي انت متوقعه وكل ده بالإضافة إلى شوية عقبات وعوائق هاقول لك عليهم في الشرح اللي جاي، وصدقني الموضوع مش كبير وهتقدر تستوعبه بسهولة.

نفسك وإمكانياتك

ربنا سبحانه وتعالى لما خلقنا في الدنيا دي خلق لكل بني آدم فينا بصمة وميزة يتميز بها عن غيره، فلازم تكون عارف مميزاتك إيه أو على الأقل تسعى إنك تعرفها، عشان تقدر تنميها وتتعرف على نفسك وتستغل طاقاتك ومجهودك صح.

ناس كثيرة جدا بتعيش وتموت في الدنيا دي وهي مستخدمتش بــ 50 ٪  بس من المميزات اللي ربنا أداها لها

وفي طرق كثيرة جدا ومتجربه تقدر تعرف بيها إمكانياتك، منها تقديراتك في الناحية العلمية وكمان معدل إجهادك البدني والعقلي لو شغلك بيحتاج حركة كتير، فتقدر إن أنت تحط حد أدنى وحد أقصى لنفسك من كل الاتجاهات، وبكده تكون اتعرفت على نفسك وإمكانياتك من أكتر من ناحية بمنتهى السهولة، فطالما ربنا أراد إنك تكون في مكان لازم تبذل فيه قصارى جهدك وتحس أن ده مكانك فعلا.. ولو ما حستش ده امشي.

طيب إيه علاقة إمكانياتك وشخصيتك بالدورات اللي انت حابب تقدمها عن طريق التكنولوجيا؟.

سياسة وحقيقة الدورات عبر الإنترنت

ناس كتيره جدا بتبدأ تعمل صفحات وهمية تبيع فيها الوهم للناس بالمعنى الحرفي للكلمة، وللأسف دول كتير جدا فبقت الناس محتاره أنها تصدق الحقيقي حتى لو كل الدلائل بتقول إن الشيء ده حقيقي وموثوق، وكمان فيه اعتقاد عند بعض الناس إنهم ممكن يعلنوا عن كورستهم على أي منصة إعلامية وده هيخليهم  أغنياء جدا في فترة بسيطة، وده بيكون الهدف من ورآه مادي تماما ومفيش فيه أي إفادة تانية يقدر يقدمها للناس يعني “نصب خالص النية مكتمل الأركان”.

الدورات المفيدة فعلا بتستهلك وقت ومجهود كبير جدا من الشخص اللي طالع يقول المحتوى حتى لو مضغوط في مدة زمنية ولتكن نصف ساعة، ومعظم الناس مش بتقدر حجم الإرهاق اللي الشخص ده بيكون فيه، ويكاد يكون الشخص ده مرتبط مع تيم عملي كامل عشان يطلع المحتوى اللي الناس شايفاه صغير ، واختيار الموضوع في حد ذاته اللي هو طالع ستكلم فيه  أمر مكلف ماديًا ومعنويًا،

ولكن الدورات دي مفيدة جدًا وبتلائم إمكانيات الناس  بشكل كبير، وده لأن بيكون عليها تخفيض في السعر وفي المقابل كم لا بأس به من المعلومات، وده بيوفر على الناس  عناء البحث عن المضمون بشكل شخصي،

وكمان الدورات الأون لاين الناس عرفت قيمتها الحقيقية في الكورونا وأيام التباعد والعزل الصحي، فلو أنت قادر تقدم الأفضل لازم تسعى إنك تعمل منصة خاصة بيك وميزانية حتى لو ضئيلة وتبدأ، وبالتدريج هتقدر تزود نسبة الاشتراك من خلال الانتشار بطريقة الترشيح أو بدافع الفضول اللي بيغلب طبقة معينة من الناس وبيحبوا يستكشفوا يشوفوا إيه المضمون اللي محصلش اللي الناس بتشاور عليه ده.

أهمية الإعلانات

الإعلانات لها نوعين اثنين أهم من بعض، الأول ودي الإعلانات اللي بتدفع لها فلوس، ودي تكلفه عالية جدا على ناس لسه بتبدأ ترسم طريقها أو مافيش معاها فلوس وده وارد جدا، لأنك بادئ مشروعك عشان يبقى معاك فلوس أصلا..
النوع الثاني بقي وده اللي بيكون مجانا بدون إعلانات وده من وجهة نظري أهم من النوع الأول لان ده بيكلفك موجود و بيخليك تعرف الجمهور عايز إيه أو دماغ الناس متوجهه لفين، لان لو عايز تقدم أي دورة على الإنترنت لازم يكون في دماغك فكره، والفكرة دي مش هتيجي من تلقاء نفسها بالعكس، عشان تحقق ربح ويكون لك ناس بتحبك لازم تتفاعل مع الناس وتشوف الاتجاه الدنيوي رايح على فين.

فلو نجحت إنك تكسب شخص واحد ينضم لدورتك، الشخص ده هيرشحك لناس تانية طبعا تحت شروط معينة، منها إنك تكون محترم وإن الفكرة تكون مختلفة وإنك تكون بتقدم حاجه مفيده هو استفاد منها ويقدر يشرحها بطريقة تشبه طريقتك من كتر ما هو أتأثر بيك لناس تانية، وكل دي عبارة عن إعلانات مباشرة وغير مدفوعة الأجر كلها بتصب في مصلحتك.

ما فيش حد يقدر يقدم أي محتوى حتى ولو كان هادف من غير ما يكون له جمهور، فما بالك بقي بكورس غير في حياة الناس أكيد هيكون عليه طلب ودي حاجه مؤاكده جدا وعلم مثبت بشهادات وناس كثيرقدروا يحققوا ده .

بدائل سريعة بس مش سهلة

الدخل الشهري أو السنوي لأي حد بيشتغل من سنين وعنده جمهور  بيخلي فيه غشاوة على عيون كل واحد عايز يبدأ نفس الطريق بفكرته، عشان كده لازم تفهم وتستوعب إن الطريق اللي في نهايته النجاح والوصول استحالة يكون سهل زي ما انت متخيل، لازم يكون مكلل بالصعوبات..

فهيكون هنا بديل قلة الماديات إنك تستغل الموارد البشرية اللي حواليك بأي طريقة ممكنة وده هيخلي الدورات بتاعتك تعمل إعلانات بشرية لنفسها وتتوسع فكرتك بين الناس بشكل جميل وهتكون بدأت بداية سليمة بخطوة ثابتة، لأنك لو بدأت تعمل إعلانات ممولة من الأول خالص ناس كتير هتشوفك بس مش هتثق فيك غير لما تجربك الأول فهتلاقي نفسك بترجع تعمل أسلوب الدعاية الأول اللي هو بدون إعلانات .
وممكن تستخدم دايرة معارفك أولا ثم دايرة صحابك، وده هيكون البديل عن أي نقص مادي في رأس مالك لما تيجي تعلن عن أي المحتوى التدريبي من خلال الإنترنت، كمان مش لازم تستخدم البرامج المحترفة لأنها بتكون بتكلفة مادية كبيرة ممكن تستبدلها بالبرامج المفتوحة في البداية وبعدين اشترى البرامج المدفوعة ،

وعشان تزيد من نسبة مبيعاتك ويكون فيه إقبال لازم تكون مختلف وقادر تظهر الاختلاف ده لنفسك وتثق فيها، كمان تقدر تعمل بحث عن أهم المواضيع اللي بتتناولها الكتب الجديدة والتطبيقات زي الانستجرام وتكون فكرة مناسبة وده هيزيد من نسبة بيعك وبالتالي هتقدر تستخدم التسويق المجاني فدخلك هيزيد أكتر وهيكون ليك عائد مادي ثابت، المهم التسلح بالمثابرة وبمميزاتك.

طب ايه الممارسات اللي ممكن تعملها علشان تسوق لنفسك مجاني 

• اعمل جروب برايفت لجمهورك وقدمه فيه محتوى عالي القيمة.
• اعمل قناة يوتيوب واسعى أنك تجيب عدد كبير من المشاهدات.
• اعمل ويب سايت واكتب مقالات زي المقال اللي بتقراه دلوقتى وده هيساعدك تظهر في جوجل بشكل مجاني.
• قدم محتوى مفيد على بروفايلك الشخصي.
• قدم شيء مجاني لجمهورك ,استشارة مثلا أو كتاب مجاني أو تدريب أو ميني كورس .
• قدم محاضرة مجانية لايف