حاولت قبل كده إنك تفكر بالورقة والقلم؟
و حاسس إن تركيزك مشتت بين أكتر من هدف؟
ونفسك تستخدم تركيزك ومجهودك العقلي في حاجة مفيدة؟
مش فاهم يعني إيه معنى مصطلح التركيز الرأسمالي وازاي تقدر تستخدم نظرياته؟
في المقال ده هنتكلم عن النقاط التالية:
- أزاي تقدر تركز على الهدف.
- إيه علاقة الإبداع بالتركيز.
- فوائد الورقة والقلم.
- استراتيجيات التركيز.
المشتتات اللي بتتعرض لها على مدار اليوم من السهل جدا أنها تكون سبب في عدم الوصول للحد المطلوب من التركيز، بس مش هي لوحدها الأسباب في حاجات كثير مرتبطة ببعضها ، ومن ضمن الأسباب عقلك.
ازاى تقدر تركز على الهدف
ممكن تكون في استراتيجيات كثير وطرق أكثر لتحسين طريقة تفكيرك وتركيزك على الأهداف، ولكن عشان كل النظريات دي تنجح لازم تكون في استعداد نفسي وبدني لبذل المجهود المضاعف.
الموضوع مش صعب ولا مكلكع كل ما عليك أنك هتتسلح بأسلحتك النفسية من الثقة بالنفس والقدرة على التحمل والرغبة في التنافس والوصول إلى الأهداف ..، أول حاجة لازم تعملها بعد ما بتحدد الحاجة اللي انت عايز توصل لها أنك تقوم بتجزئتها،
فلو الهدف افترضنا أنه مثلا دائرة من البيتزا وانت قطعتها إلى 12 مثلث، وكل ما هتخلص قطعه هتحس بالإنجاز وهتشوف قدامك جزء من الهدف ده وهو بيتلاشى وبيفتح قدامك طريق لإنجاز تاني أكبر.
كمان لازم يكون تركيزك في متناول عقلك، وده بمعنى أن الوقت اللي هتحتاج فيه استدعاء طاقتك هتقدر تعمل ده فيه بكل سهولة.
كمان في طريقه اسمها الجدولة، ودي ببساطة عبارة عن جداول بتكتب فيها أهدافك والناحية التانية من الجدول العقبات اللي هتواجهك عشان تركز فيه، وبيكون فيه خانة مخصصة لتقييم مدى تركيزك وإصرارك وسرعة تحفزك للبلوغ والتحقيق.
إيه علاقة الإبداع بالتركيز
الشخص اللي بيقدر يركز أكثر بيخرج من دائرة التفكير العادية و بيبدا يستكشف مهاراته سواءً كانت العقلية أو الجسدية وهنا بيكون لمس أول سلالم الإبداع.
وده مش لأنه خارق للطبيعة أو من المميزين اللي في الكون، ولكن هو قدر وسعى فأصبح شبيه لهم، كمان هنا المخ بيكون في مرحلة يقظة باستمرار، فالمخ بالضبط عامل زي اعتياد الطفل الصغير لو أتعود إنه يسكت في وقت معين هيسكت فيه بشكل تلقائي وهكذا..
فوائد الورقة والقلم
لو أنت من الأشخاص اللي مش بيستخدموا الورقة والقلم في حياتهم فصدقني فايتك إبداع جميل وتخطيط رائع ووصول أسرع وخطوات أوضح، الورقة والقلم مش سحر ولكنها مجرد وسيلة فعالة لتنظيم أفكار دماغك وده بيساعدك على التركيز ورؤية الأمور من كافة الاتجاهات،
كمان التفكير بالورقة والقلم ورسم أشكال واستخدام ألوان بيحفز الدماغ أكثر على الحفظ والتذكر وسرعة الاستدعاء، عشان كده لو أنت طالب وبتذاكر معلومات لأول مرة أنصحك إنك تعمل خرائط ذهنية.
كمان لو أنت قدرت تركز بشكل متواصل هيبدا مستوى تركيزك في الانحدار وده لان دماغك بس هي العضو الفعال فيك أو النشط بمعنى أصح، بينما لو بتستخدم الكتابة وليكن مثلا للشرح أو التقديم أو تقييم مشروع ما،
بتقدر ركز على كل شيء بدون قيود وبدون مشتتات لان ببساطة كل حاجه هتفكر فيها سواء كانت ربح أو خسارة أو فرضيات لسه مش عارف هتحققها ازاي وبتحاول تركز عليها هتكون قدامك.
استراتيجيات التركيز ببساطة
أول حاجة تقدر تعملها لنفسك عشان تستخدم أي طريقه لتعزيز تركيزك إنك تكرم نفسك، وده بمعنى أنك تأكل وتنام كويس وتبذل مجهود بدني وفكري بالحد المعقول، لان مش طبيعي أنك تكون مثلا طول النهار في مجهود بدني عنيف وبدون راحه عايز تركز مثلا في حساب أرباح شركتك وتحصل على النواتج بأسهل الطرق وبدون أخطاء.
فلو أنت عملت كل ده أقدر أقول لك إن أول طريقه خاصة بانك تتكلم مع نفسك، تسأل نفسك وتجاوبها، وده بيخليك تشرح لنفسك المعلومات اللي دماغك استقبلتها في مدة زمنية معينة بشكل بسيط، وده بيسهل عليك إنك تفتكر الرموز العقلية دي قدام زملائك مثلا.
كمان تقدر تعمل ملخصات للحاجة اللي عايز تركز عليها وتخلي الملخصات دي قدام عينيك باستمرار وده هيخليها حاضرة في الذهن، وهتعرف من خلالها نقاط القوة والضعف اللي عندك وده في حد ذاته سلاح ذو حدين،
وكل واحد منهم ميزة مختلفة عن التاني، فظهور نقاط الضعف كأنك مشيت نص الطريق ومحتاج مقومات للوصول وبمجرد ما بتقويها بتوصل، بينما نقاط القوة دافع نفسي رهيب تقدر من خلاله تقوي نقاط الضعف وهتحس من خلالها إنك أنجزت شيء،
والشعور بالإنجاز بطبيعة الحال هيشجعك إنك تركز وتكمل وهيبعدك عن الخمول الفكري والنفسي اللي بيشتتك. طيب لو أنت عملت كل ده هل مش هتقدر تركز! مستحيل، لأنك مستسلمتش للخمول والفشل ولا عززتهم جواك،
أصل مافيش حالة تالتة للسكون أو الحركة، ولا فيه اتجاه تالت لليمين والشمال، عشان كده لو استخدمت قدراتك الذهنية والنفسية والاجتماعية وطوعت حياتك لخدمة هدفك هيكون من السهل جدًا إنك توصل وتحقق غايتك.
