طرق فعالة لزيادة التركيز تساعدك فى تحقيق أهدافك

عمرك سألت نفسك ليه مش بتحقق هدفك على الرغم من مجهودك المبذول؟
سألت نفسك قبل كده إنت ليه سريع التشتت؟
أسباب قلة تركيزك؟ وإزاي تقدر تحسن من نفسك؟
في المقال ده هنتعرف على:

• أعراض قلة التركيز.
• أسباب الشرود الذهني وقلة التركيز.
• النتائج المترتبة على ضعف التركيز والإنتباه.
• هل تمارين زيادة التركيز مفيدة أم مجرد خدعة.
• طرق فعالة لزيادة النشاط الذهني والتركيز.

عدم القدرة على التركيز في حاجه بتحصل حواليك أو معلومة عايز تعرفها مش محدد لسن معين من الناس، ده عرض ليه عوامل وأسباب، وزي ما كانوا بيقولوا زمان إنه إذا عُرف السبب بطُل العجب، وأنا هنا عشان أعرفك الأسباب وأخليك تتعرف على مخك وقدراته بشكل جديد.

أعراض قلة التركيز

لو عايز تعرف وتتأكد إن عندك نقص في القدرة على التركيز كل ما عليك إنك هتبص على نفسك ونشاطك اليومي، هتلاقي عدم إنتظام في عملية النوم بشكل متواصل وده لأن دماغك من قلة تركيزها هتبدأ تسرح وهتبذل مجهود في السرحان ده، حتى لو إنت مش واخد بالك طول اليوم إنك مش مركز هتيجي آخر النهار تلاقي نفسك مصدع ومش قادر تنام من كتر الوجع اللي في راسك.
وكمان هيكون النسيان قرين حياتك، وده مش بس هيكون في أغراضك الشخصية، بل هيكون في مواعيدك وعلاقاتك وحتى أدويتك المهمة وهتلاقي إن الذاكرة قصيرة المدى أقصر من الطبيعي، فبالتالي مش هقدر أوصفلك شكل حياتك هيكون إزاي مع نفسك ومع إللي حواليك.
وبناءًا على كل الأعراض دي هتلاقي مستوى أدائك الوظيفي أو الدراسي إنخفض أكثر من المعقول، وكمان جهازك العصبي هتفقد السيطرة عليه وده لإنك هتحس بالفشل والتوتر والصداع الدائم ولذلك هتكون أكثر قابلية للإستثارة والعصبية.

أسباب الشرود الذهني وقلة التركيز

بعد ما قدرت تحدد إذا كان عندك أعراض السرحان وقلة التركيز ولالا، لازم تحدد السبب عشان تقدر تواجهه.
ممكن يكون السبب هو أصلًا زيادة تفكيرك في موضوع معين فتفضل سرحان فيه ومش منتبه لأي حاجه تانية، كمان ممكن يكون لقصور في نمو شخصيتك وخاصة عند الناس إللي مدركة القصور ده، هتكون مشغولة إنها تنمية وحاسه إن كل الأشخاص حاسين بده هم كمان، فالذهن بيرفض ده بشكل تدريجي ويبدأ يعزل نفسه عن رؤية الناش والتعامل معاهم عن دراية وتركيز.
بالإضافة إلى إن المشاكل المادية عامل مهم لقلة التركيز، بحيث تكون الدماغ مشغولة التفكير في مخرج من الأزمة وبتعمل حلول وجداول إفتراضية للنجاح والسقوط لتلك الحلول، ودي عملية معقدة بالورقة والقلم فما بالك بإن الدماغ بتعمل كل ده جواها ولوحدها وتحت الضغط العصبي والخوف.
ولو كنت مريض وبتتناول دواء معين، لازم يكون عندك وعي طبي بالتأثيرات اللي هيسيبها في جسمك، لأن الدواء زي ما هيعالج حاجه في مرضك هيكون سبب لمرض تاني وهكذا..، وخاصة أصحاب القصور في انتظام ضربات القلب أو ضغط الدم.

النتائج المترتبة على ضعف التركيز والإنتباه

لو النتائج مقتصرة على حياتك العملية ونجاحك وفشلك فيها فكان بها، ولكن بجانب كل ده إنت هتكون مصدر إحباط لنفسك واللي حواليك وكمان هتكون خطر على حياتهم وحياتك.
كتير بنسمع عن حوادث الطرق وأغلبية الأسباب من الشخص إللي سايق أو المصاب بتكون قلة التركيز والإنشغال الذهني بشئ معاكس للرؤية، وده للأسف بيكون بيعرض نفسه وغيره للموت من غير ما يحس.
كمان مش هتقدر تساعد نفسك على أي صعيد في حياتك، يعني محدش هيقدر يدخل معاك في نقاش لأنك مش مركز ومش عارف تجاري الحوار.
وللأسف المشكلة دي بتكون عند الأطفال والشباب في سن المراهقة بشكل كبير جدًا، وده بيكون سبب لعدم قدىتهم على المشاركة في الأنشطة المدرسية أو المنزلية، وتبدأ حلقة عدم التركيز المؤدي إلى ضعف الشخصية ثم الإعراض عن التعامل مع الناس ثم قلة تركيز زيادة.. وهكذا حتى تنتهي طاقة الشخص يوميًا على أشياء تافهه هو نفسه مش عارفها.

هل تمارين زيادة التركيز مفيدة أم مجرد خدعة

لو قدرت تعمل حاجه تنمي ذاكرتك وتحافظ على تركيزك البصري والعقلي هتهرب منها ولا هتسعى ليها!.
الحلول مش سحرية ومش هتصحى بين ليلة وضحاها تلاقي دماغك جبارة وذكائك عدى كل الحدود، ولو عايز تفاصيل اكتر فالعنوان إللي جاي ده بتاعك.

طرق فعالة لزيادة النشاط الذهني والتركيز

1- أول حاجه التمارين

دي بتهدف إن ذهنك يكون يقظ ومتصل مع جوارحك، زي مثلًا إنك تِعد الأرقام بشكل تصاعدي أو تنازلي بدون أخطاء في مخك، أو تقوم بكتابتهم فتستخدم إيدك فيقل شرودك نظرًا لإنشغالك، .

2-تاني حاجه بتستخدم طاقة تفكيرك في أكتر من حاجه

زي إنك تشوف قدامك حاجه لمدة بسيطة وترسمها في خيالك بتفاصيلها، وده بينمي الذاكرة البصرية من غير ما تحس مع تركيزك الطبيعي.

ولازم مع أي طريقة هتستخدمها للتغلب على المشكلة دي إنك تقيّم دوافعك وظروفك، فلو إنت طالب أو رجل أعمال

• لازم تنام عدد ساعات كافية
• وتتأكد إنك بتشرب ميه كويس وبانتظام
• وبتتناول أطعمة مفيدة لجسمك وصحتك،
• كمان تهيأ نفسك قبل ما تركز بإنك تبعد عن مصادر الصوت إللي حواليك
• وتقفل تليفونك لو هو مصدر إلهاء ليك وتبدأ بالتدريج وتعيد على المعلومة كل شوية وتثبتها بطريقة سهل استرجاعها.
• كمان متسمحش لنفسك بالكسل وخليك رافض من جواك الشعور ده،

وتقدر تستغل أوقات اليقظة في حاجات مهمة تخلي تركيزك متواصل،

• زي إنك تفصل بين المهام بحاجة بتحبها أو تكافئ نفسك على تركيزك لوقت معين لو اتحديت نفسك ووصلتله،
• وأخيرًا الكسل مكروه من البشر ورب البشر عشان كده لازم تستعيذ منه بعد كل صلاة وتقتدي بسنة نبيك الكريم.