لماذا تجعل العميل في المقام الأول قبل الربح

عايز تكتسب عملاء جداد ومش عارف ازاي؟
نفسك تسوق منتجك وتعمل مبيعات كبيرة؟
في المقال ده هنتكلم عن أمور تهمك:

1. بداية طريق الترويج السليم.
2. الغرض من زيادة المبيعات.
3. عنصر السعر والإعلان.
4. أساليب لزيادة المبيعات .

مهما كانت خطتك لازم تعرف إن إعادة هيكلة نظامك كل فترة ومعرفة أهدافك واستهدافاتك المستقبلية ده أمر مهم جداً ولا بد منه،

وده لأن زي ما سوق المبيعات بيتغير وبيتقدم كل يوم عن اللي قبله، سوق البيع عبر الإنترنت بردو بيتغير وبيتطور بسرعة مذهلة، وسواء كان السبب في ده تقدم وسائل التواصل والتكنولوجيا أو تغير الأذواق أو تنوع الاحتياجات،

فلازم يكون فيه عندك قابلية للتجديد واتباع أحدث الوسائل المساعدة للوصول إلى هدفك الربحي أو الشهرة .

بداية طريق الترويج السليم

لما تيجي تبدأ طريقك في البيع عبر الإنترنت هتلاقي نفسك زي اللي خرج من أوضة مقفولة على مكان مفتوح، قدامك ناس كتير وصلت، وناس لسه بتبدأ طريقها معاك، وناس تقدمت عليك بخطوة أو خطوتين،

كل ده هتحس بيه على هيئة رياح تنافسية حواليك لازم متفضلش واقف مكانك وتتحول لرياح زيهم عشان ماتحسش بالبرد وسطيهم ، أو تحس إنك متكتف ومش قادر تعمل حاجه.
أول حاجة لازم تعملها هي إنك تعمل دراسة تنافسية للسوق اللي هتبدا تكون ركن من أركانه،

كمان لازم يكون عندك خلفية عن شرائح جمهور المستهلكين في السوق وتحدد أنهى منهم هتوجهله حملتك الإعلانية، من هنا تحديدا هتبدا تحدد شعار واسم لحملتك الإعلامية وتستخدم طرق ووسائل هأقول لك عليها بعدين عشان تحقيق نسبة المبيعات اللي بتحلم بها.

كمان لازم يكون في عندك توقعات لكل حركة تجارية هتعملها وده من بداية تحديد المحتوى اللي هتقدمه والألوان والصور والفيديوهات اللي هتستخدمها في الحملة دي عشان تزود دخلك وتبنى سمعتك بين الناس،

وتفكر أكثر من مرة وتستشير أصحاب الخبرة أو ناس أنت بتثق فيهم عندهم تجارب سابقة في نفس المجال، وده بيتم بشكل احترافي وجميل لما يكون الفريق اللي هتستعين بيه من بداية طريقك موثوق وشاطر وعنده خبرة يقدر يفيدك بها، بالإضافة إلى وجوب وجود مفاهيم مشتركة بينكم عشان يكون في توافق فكري وتنفيذي.

اجعل العميل في المقام الأول

خليني أقولك إن السوق كله بيهدف إلى الربح المادي أكتر من أي شيء تاني وده مش عيب بالعكس دي حاجه كويسه جدا لكن ما ينفعش تبقى هي في المقام الأول كهدف قدام عينك لما تجيء تبدأ طريقك، وده لأن في أكتر من طريقة عشان تزود دخلك..

لو أنت شركة كبيرة وعندها رأس مال كبير تقدر تنزل الإعلانات في الصحف والمجلات ونشرات الأخبار والتلفزيون والراديو وكمان تقدر تستخدم كل التطبيقات وتعمل عليها إعلانات مدفوعة الأجر، ولكن لما تلاقي نفسك بتزيد بسرعة كبيرة أعرف إنك هتنزل بسرعة كبيرة بردو،

وده لأن الناس بتحب تصدق الشخص الصادق واللي عنده شفافية وموضوعية ورسالة فعلية يقدمها من محتواه، كمان تحب تكون في المقام الأول قبل الفلوس وده لأن الجمهور زي ما قرر إنه يستهلك سلعة معينة لو طلع الأفضل منها حتى لو على نفس مستوى الجودة والطراز هتسيبك وتروح للشيء الجديد ده حتى لو كان مش هيقدملها حاجة زيادة عن اللي انت بتقدمه،

وده شيء مستمر في الحدوث بمزاجك أو غصب عنك للأسف، عشان كده لازم تضمن اهتمام شريحة المستهلكين وتضمن ولائهم ليك عن طريق استراتيجيات بيع منظمة وجذب انتباه وتحسسهم إن مصلحتهم هي في المقام الأول في قائمة اهتماماتك،

ولو ده حصل هتلاقي فيه إقبال وشهرة واسعة على المستوى المحلي والدولي وهتحقق المكسب اللي نفسك فيه، بل على صعيد آخر هتلاقي فيه مطالبة بوجودك على برامج وتطبيقات تانية غير اللي انت بتستخدمها عشان يستفيدوا من شعبيتك وحضورك،

كمان تبدأ تنوع في منتجاتك بالشكل اللي تحبه تحت شعار واحد فبالتالي دخلك هيزيد مع ثبات شعبيتك وجمهورك.

عنصر السعر والإعلان

زي ما في ناس بتدور على الجودة الخاصة بالمنتج قبل السعر في ناس بتدور على السعر وتشوفه مناسب ليها ولا لا قبل الشراء، والشاطر الحقيقي هو اللي يقدر يوفر في محتواه المواصفات المطلوبة بالسعر المناسب برده، وده بيظهر بشكل واضح وصريح في الإعلانات.

عشان كده لازم تعرف إن زيادة وجودك في السوق ووجود اسمك وكيانك مرتبط بقيمة الإعلان اللي هتقدمه على أي منصة، فمهما كانت طبيعة الإعلان صورة أو فيديو أو حتى رسوم متحركة لازم تتحرى عنصر الدقة والاختيار الجيد قبل ما تعرضه على الناس،

وتقدر تعمل تزاحم إعلاني على نفس منتجك بالاستعانة بالله أولا طبعا ثم بمجهودك ثم بكوادر ناجحة معروفة للناس، وبشكل تلقائي هتلاقي نتيجة على كافة المستويات، سواء كانت الشهرة أو المبيعات أو الدخل المادي، بالإضافة إلى الإعلانات الممولة دي بتجيب جمهور كبير مع الوقت،

فهي زي ما يكون فيه عندك طاقة وقادر تكسب السباق ولكنك عطشان ومجهد، فالإعلانات هي اللي هتخليك تكمل بسرعة وهتديك الطاقة الجسدية والنفسية عشان تستحمل وتكسب.

أساليب لزيادة المبيعات

كانوا بيقولوا زمان إن في الحرب كل شيء متاح، وأنت في السوق التجاري لازم تستغل كل صغيرة وكبيرة في حياتك وتتعامل معاها على إنها مصدر إلهام مؤثر في حياتك.
فعلى سبيل المثال تقدر تعرض في إعلانك أن الدفع عن الاستلام  لو المنتج أون لاين،

كمان تقدر تاخد آراء الناس اللي اتعاملوا معاك وشكروا فيك وتعرضها بصدق قدام الجمهور، ده بيفرق مع فئة كبيرة من الناس اللي نفسها تجرب وخايفة من الفشل وعدم الثقة، فلما بيكون قدامهم مثال حي على النجاح والنتائج النهائية المرضية،

بتبدأ العملاء تتواصل معاك وتسمع منك لأن بطريقة عرضك أيا كانت أنت بتسلط الضوء على المميزات اللي عندك ومش عند حد تاني غيرك، فكل المناطق حولين العميل بتكون مضلمة وانت بس اللى ظاهر قدامه .

وكمان تقدر تتابع التعليقات السلبية والحاجات اللي محتاجة تتعدل في منتجات المنافسين وتشير في إعلانك إنها من ضمن مميزاتك متوفرة عندك بشكل رائع وجذاب، كمان لازم تكون محدد بناءً على طبيعة المنتج طريقة الاستعراض وأماكنها الصحيحة عشان تحقق مبيعات عالية،

كمان تعرض في إعلانك إن المنتج قرب يخلص أو إن العرض لفترة محدودة، كمان تستغل مدة العرض في إبراز المميزات بشكل سلس وواضح للجمهور، وتبعد عن أي سلبيات أو تهديدات لفظية صريحة ، كمان لازم يكون في عندك أهداف قصيرة المدى بشكل يومي أو أسبوعي وأهداف طويلة المدى متعلقة بالفلوس والمكسب.