بتشوف في شغل اللي حواليك نسبة مبيعات كبيرة ومش عارف السبب؟
عايز تعمل زيهم وتببع دورتك ومنتجك بسعر كويس؟
نفسك تعرف تركز على الأسس الصحيحة للبيع والتسويق من خلال الإنترنت؟
في المقال ده هنتكلم عن حل مشكلة عدم بيع كورساتك اونلاين :
- التكنولوجيا مضرة أحيانًا.
- الأسس الصحيحة للتسويق.
- التركيز نصف المشوار.
- مرحبًا لقد لاحظت أنك..
حل مشكلة عدم بيع كورساتك اونلاين
لو مافيش معاك غير كاميرا تليفونك ودماغك فأنت قادر تعمل أحلى محتوى لو بس استخدمت تركيزك والكام حاجه اللي هتفهمها مني في شرح العناصر اللي جايه، وعشان مش من السهل إنك تنجح بسرعة كبيرة ولا من الصحيح بردو لأن كل حاجه بتاخد وقتها ودورة صناعتها كاملة، فإنت محتاج تتعرف على الأخطاء إللي خلت دورتك بطيئة ومتعلقة على الصفحات من غير تفاعل يرضيك ولو بنسبة بسيطة ويكافئ مجهودك.
التكنولوجيا مضرة أحيانًا
استخدامات التكنولوجيا مش كلها تكون في صالحك وده لأن الموضوع بالظبط عامل زي ما بتكون عملت أكله حلوه بس زودت لها الملح شويه، ده بيلغي ده.. ولذلك فإن استخدام البريد الخاص بيك أو حتى تسلسل الفيديوهات بيحتاج إنك تعرف انهي قطاع في السوق هو الأفضل لاستيعاب وشراء منتجك، لانك لو محددتش شريحة المستهلكين اللي هيكونوا غصب عنك هم الجمهور الأول ليك في بداياتك هتكون ساعتها التكنولوجيا عبارة عن كابوس حياتك ومش هتقدر تستفيد منها في أي حاجه
وكمان هتضيع وقتك على الفاضي وده هيدمرلك شغلك وحياتك ومجهودك وهتحس انك مش عارف تعمل حاجه زي الناس، هتقارن بينك وبين غيرك ومش هتكون عارف موطن الغلط اللي انت ارتكبته فين.
تاني حاجه لازم تدفع بيها حركة الصدام مع أخطاء استخدام التكنولوجيا هي إنك تكون عارف انت هتتكلم مع جمهور عايز منك ايه وتقدر تتعرف عليه من خلال تعليقاته السلبية أو التوجيهية إللي هتتقدملك باكثر من طريقة وعلى طول مشوارك،
وده لأن مش الشاطر بس هو اللي بيوصل للنجاح ولكن اللي بيعرف يحافظ عليه ومش بيكون نجاح لحظة وراحت لحالها.. لا ده مشوار عمر بحاله، ولذلك فإن صياغة وتنسيق محتواك من أهم المعايير البي من خلالها هتنقل نسبة مبيعاتك في حته تانيه خالص، وده من خلال تحديد صياغة المضمون بشكل جيد خالي من التعابير المبتذلة والكلمات مهروسة الاستخدام عند المنافسين وده عشان تدي ايحاء بالاختلاف وضرورة الانضمام ليك عشان الفايدة طبعا.
كمان تقدر تعمل إضافة للكورس بتاعك على منصة خاصة بيك ودي من أهم مميزاتها أنها بتوسع نطاق انتشارك بشكل ملحوظ، وده بيخفف من عليك عبء الترويج فيما بعد بأكثر من طريقة وبعمل إعلانات عن نفسه بنفسه، وتقدر تسأل عن ده متخصصين في المجال وتستفيد منهم باحترافية ازاي تقدر تعمل ده في وقت قصير.
الأسس الصحيحة للتسويق
مافيش جمهور هيجيلك لحد عندك ويقول لك بيع لى او استغلني او اعرض لي منتجك ومحتواك وعرفني على نفسك، علشان كده التسويق والترويج عمليه مهمه جدا على طول مشوارك مش بس في البدايات، ورقم واحد عشان تبدأ التسويق صح هي انك تعرف السوق العملي محتاج منك تتجه في انهي إتجاه، وتستخدم ايه في عروضك وتفكر ازاي وكمان تعبر بأنهي اسلوب، كل الحاجات دي لازم يكون ليها تأثير كبير على طريقتك الشخصية في العرض وتعمل ميكس ما بين الاتنين عشان تطلع محتوى مختلف وجذاب.
تاني حاجه عايزك تفهمها هي انك حتى لو بتقدم محتوى كويس ولكن لفئة غلط مينفعش تخاطبها دلوقتي او توزيعها الجغرافي بعيد عنك بشكل كبير فانت كده لا هتقدر تستفيد من انضمامهم لجمهورك ولا انك تبيع لهم كمان، كمان لازم تخلي بالك من نمط المعيشة للناس اللي انت بتقدملهم محتواك وكمان سعر دورتك، لان مينفعش مثلا تيجي لطبقه فقيرة ساكنه في منطقة عشوائية تعمل عليهم منتج بقيمة مليون جنيه وتستنى منهم شراء بلهفه، طموح حلو ولكن في فرق بين الذكاء واستخدامه وما بين الذكاء والمجازفة تحت بند الحظ.
التركيز نصف المشوار
أي طالب في حياته ودراسته اليومية مطالب منه يكون على قدر من التركيز عشان يقدر يحسن درجاته ويتخرج ويشتغل ويجيب فلوس، وأي شخص شغال مطالب منه يركز عشان يحافظ على مصدر دخله الشهري ويجيب فلوس، وأي حد حابب ينزل من بيته ويشتغل مطالب انه يركز بردو عشان يجيب فلوس.
تلاحظ هنا إن حتى لو الناس اختلفوا في نوعهم وشخصهم وشغلهم إلا أنهم متفقين في بندين بس وهم التركيز والفلوس، وده لأن الكلمتين دول مقترنين ببعض في الحياة العملية والتعليمية والاجتماعية وغيرها..، وانت كمان كشخص هيبيع ويروج لدورته التعليمية أو التدريبية محتاج يركز من بداية اليوم لآخره عشان يبيع ويجيب فلوس “حلقة مفرغة”.
ولذلك انت لو هتعيد حساباتك في محتوى دورتك أو طريقتك أو أسلوبك أو أي حاجة انت بتعملها أو هتبدأ من جديد محتاج برده انك تضيف خانة التركيز في حياتك وتخليها قدام عينيك في كل خطواتك الفكرية والعملية، ومن أهم مراحل التركيز المهمة فعلًا واللي قادرة بتأثيرها انها تثبت كفاءتك أو تنهي وجودك بتتفرع لشعبتين، أولهم التركيز على بداية رسم قوس الأعمال إللي لو ركزت على النص التاني معاه مش هيتقفل أبدا، وهو التركيز بردو على خط الوسط.. بمعنى الجمهور المتفاعل والخامل على حساباتك، لأن لكل شخص نقطة جذب بتحركه، ونت محتاج تركز عليها عشان تعرف تتعامل معاها وتكسب الماتش ده ومتقفلش القوس أبدا ولا تخسر.
مرحبًا لقد لاحظت أنك..
كان فيه طريقة جديدة بعد ربط الكورس أو الدورة بالبريد بتاعك ومنصتك الخاصة وهي إنك تفعل اشعارات الدخول والخروج من حسابك بحيث انك تقدر تعرف الزائر ده كان عايز ايه، أو لو اتفرج على خمس دقايق مثلا وخرج تقدر تقوله وتسأله إنت خرجت ليه، وده بيكون على هيئة رسالة على البريد ومن البريد بردو للشخص ده، فلو إنت عملت ده مع كل انسان خرج ودخل عندك هيحس اد اي هو مميز ومهم
وكمان هيبدأ يتسائل عن طريقة استيعابك لكل الأمور اللي بتحصل حواليك مع تركيزك الفعلي على تحضير نفسك لجمهورك بانتظام وعلى مستوى عالي من الكفاءة، وده بيعملك دعاية أكتر لو إنت الكورس بتاعك أو دورتك ليها علاقة بتطوير الذات أو التغلب على عيب في الشخصية مثلا، لأن شخصيتك هنا هتكون خير دعايا ومادة خام للتسويق.
ولو ده صعب عليك أو هيحتاج رأس مال كبير بردو تقدر إنك تتبع الطريقة العادية اللي تريحك ولكن تكون مقرونة أيا كانت إيه هي بالتركيز على جمهورك مش بس على طرق الربح، وزي ما بتدرس نمط المعيشة والحياة في البداية هتكون ملزم إنك تضم لقائمتك تاني الناس اللي وقعت منك وتعرف السبب وتعالجه، ولذلك لازم تصرف من قدام عينك أي شخصية سلبية مقدرتش تكمل وتقفل ودانك وعينك عن نتائج أي شخص تاني وتركز على نفسك وكيانك الإعلامي، وده لأن نسبة رضاك عن نفسك ورضا العملاء عنك هو اللي هيكسبك الفلوس اللي عايزها من البداية وتقدر تتحكم في النسبة كل ما طورت نفسك وركزت أكتر.
وبكده اكون وضحت لك حل مشكلة عدم بيع كورساتك اونلاين .
