إزاي تزود مبيعات كورساتك التعليمية؟

التميز شئ جميل ونفسك يكون جزء من شخصيتك؟
عايز تكسب من إعلاناتك وتضيف قيمة كبيرة لكيانك وإسمك؟
نفسك تتبع استراتيجية تزود من نسبة بيع دوراتك التعليمية على شبكة الانترنت؟
لو نفسك في كل ده يبقى المقال ده موجه ليك مخصوص، وده عشان هنتكلم في:

• ازاي تصيغ عرضك بشكل جذاب.
• إنفاق أكثر لا يعني صعود أسرع.
• تحديد السعر من قيمة المنتج.
• الإعلانات ذات التأثير طويل المدى.

لو عايز تبدأ تتخذ الإجراءات اللازمة عشان تكون متأكد من ان كل جنيه هتدفعه في حملتك الإعلانية هيكون له عائد عليك بعدين ومش هيضيع منك عالفاضي وتخسره يبقى لازم تكون متأكد من النقط اللي هتكلم عنها دلوقتي، والأمر هنا معمم على دورات تعليمية أو تنمية أو حتى زيادة مهارات، لأن اي حاجه منهم لازم تكون مفيدة للناس، ولازم إنت كمان تتعلم إزاي تخليهم يشوفوا الفايدة دي بعينهم ويحسوها من غير تركيز مع غيرك أو مع دخلك اللي هتكسبه من وراهم.

صيغ عرضك بشكل جذاب

اول حاجه هتحتاجها هي العنوان لأنه واجهتك اللي بتعبر عنك بين الناس اللي في نفس مجالك وهيكون علامتك التجارية فيما بعد كمان، بالإضافة إلى عنوان الحلقة أو الفيديو اللي هتقدمه.. ده بقى لازم يكون جذاب وملفت للانتباه ويكون فيه سؤال أو جواب على حاجه إنت عارف ان الناس اللي جيالك دي عايزة تعرفها.

زي ما بتكون بتقرأ افكارهم وبتديهم نبذة مختصرة عن اللي هيلاقوه جوه كلامك وطريقتك، ولو عملت كل ده لازم تتعلم وتشوف غيرك بيعمل اي وبيصيغ عرضه ازاي وتعمل زيه، مش معنى كده انك تكون شبهه أو جزء منه أو تحاول تقلده، بس تحاول انك تعمل نفس الخطوات اللي هو عملها ونجح بيها.

كمان خانة الوصف لازم تكون مميزة بشكل كبير لأنها تاني حاجه الجمهور بيبص عليها بعد العنوان و قبل ما يدخل يشوف المحتوى ايه عشان ياخذ فكره عن انه إذا كان هيستفيد ولا هيضيع وقت بس، كمان تقدر تحط صوره ليك وجنبها كلام مشجع، او صوره للمنتج بشكل جميل، أو صوره ليها علاقة بمحتوى الدورة بتاعتك، لان ده بيدي شعور بأنك شخص احترافي ومنمق في اختيار اسلوبك الدعائي، فبالتالي هيكون كلامك صائب وصحيح.
وتقدر تعمل الديزاين اللي يريحك من خلال برامج كتيرة بتعيينك انك تضيف الكلام للصور أو الفيديوهات اللي فيها شرح بحركة وتغير في الألوان والحجم والطريقه والإضاءة وغيره براحتك، كل دي حاجات بتساعدك انك تقدر تصيغ اعلانك بشكل جذاب يزيد من ربحك ومن نسبه مشاهدته.

إنفاق أكثر لا يعني صعود أسرع

الإعلانات الممولة هي الفخ اللي بيقع فيه كل واحد مفكر انه لو دفع فلوس كتيرة في الاول هيوصل بشكل أسرع من غيره، وده لان الاعلانات دي بتستفز فئة كبيره من الناس وبتخليها دايما في مكانة ممله وروتينية أثناء العرض، حتى لو المحتوى كويس ومصروف عليه إلا انه طالما بيتعرض بشكل تلقائي غصب عن الشخص فهيكون دايما كارهه ومش عايز يشوفه، معنى كده انك لو فضلت تدفع في الاعلانات دي و مفكر انها هتزود دخلك اخر الشهر تبقى بترمي فلوسك على الارض ومش بتستخدم نوعية الاعلانات دي كويس.

وفي الحقيقة الاعلانات على الدورات ذات المحتوى التعليمي شيء مثمر للغاية، إلا أن الوسائل المتبعة من خلاله بتكون غلط فبالتالي بتعمل نتائج عكسيه وبتؤدي الى هبوط المنتج والنفور عنه، ولذلك فإن الترشيد في استهلاك الاعلانات دي هو الأمر الصحيح من كافة الجوانب و كمان بيقلل فرص الخسارة أو عدم تغطية العائد الشهري لرأس المال المدفوع، وده اللي بيخلي ناس كثير جدا تدمر نفسيا وتقرر إنها تسيب المجال من قبل ما تبدأ.

تحديد السعر من قيمة المنتج

لو انا جيت قلتلك هابيعلك الكوبايه الازاز دي ب 100 جنيه وانت سألتني إيه هي مميزاتها هاقول لك انها مصنوعه من الازاز وما فيش لها اي مميزات بل انها قبل للانكسار باقل حركة ممكنة وكمان شكلها مش أحسن حاجه هتقبل انك تشتريها بالسعر ده؟، طبعا لا.

طيب لو قلت لك ان الكوبايه دي مصنوعه من الكريستال الخالص وكان سعرها 100 جنيه وعليها عرض مخصوص عشان انت عميل مميز وهبيعهالك ب 75 جنيه، هتوافق؟!, بنسبه 90 في المئة هتوافق، وهيكون في جواك قبول انك تسمع مني باقي العروض كمان و انك تشتري و تتعامل معايا، طيب كل ده ليه؟، انا أقولك.. هنا انا تعمدت أبرز مميزات المنتج قبل ما اقول لك السعر ايه، وكمان كنت واعي بسعر المنتج ده في السوق وماحبتش اني اخليه غالي عليك عشان احقق نسبة الربح اللي انا بتمناها، صادق معك وانت حسيت ده، وبالتالي كنت مستعد انك تتعامل معايا بمنتهى السهوله.

نفس الشيء ده بينطبق على الدورات التعليميه اللي موجوده على وسائل التواصل الاجتماعي، لو حبيت انك تشترك في حاجه منهم لازم تعرف ان الشخص اللي جاي عشان يستفيد منك حابب يدفع أقل ويستفيد اكتر، وانت حابب تكسب اكتر وتفيدوا بالقدر اللي عندك، عشان كده لازم تظهرله نقطه وسط تتلاقوا فيها وتتحقق الاستفادة لكم انتم الاثنين، وده على فيسبوك أو اليوتيوب او أي منصه ليك عليها جمهور ولو حتى 10 أشخاص، فلو قدمت محتوى مميز بطريقه كويسه بدون مزايدة على قيمة السعر هتلاقي ناس كتير حابه انها تنضم ليك في وقت قصير وانت هتكون الكسبان في كل الأحوال.

الإعلانات ذات التأثير طويل المدى

لو بصيت على سوق الاعلانات الموجودة في الشرق الاوسط هتلاقي ان الاعلانات اللي مكملة لاسابيع أو شهور قدام الناس في كل الوسائل وحتى على التلفزيون هتكون بتبص للمنتج اللي بتقدمه بزاويه معينه مختلفه بعيدة عن التفكير التقليدي وبتحاول تبرزها في الاعلان.

ودي اسمها الاعلانات ذات التأثير طويل المدى ودي بيكون لها فايدة كبيرة جدا على وسائل التواصل الاجتماعي، وخصوصا لو انت بتقدم دورات بأسلوب مميز وليك جمهور، لأنك هتكون بتعمل أي إعلان عن طريق البرامج وبتعرضه فيعجب ناس، والناس دي تعمل لك اعلانات بين بعضهم بدون ما تطلب ومن غير ما تدفع ولا جنيه وكل ده ربح ليك وهكذا..

ولأن جوهر الفكرة مهم للبيع لازم تكون متأكد ان شيء ده الناس عايزاه وبتدور عليه، زي مثلا لما تروح في مكان مافيش فيه ميه بقاله اسبوع، وتبيع ازازه ميه بنسبة أملاح اقل من العادي ب 10 جنيه ساعتها الناس هتشتري منك من غير تفكير لانها محتاجه، من غير ما تفكر اذا كان في عروض اقل منك ممكن تتقدم لها او لا، وده لانها شايفه انك السبيل الوحيد وطوق النجاه الامثل للخروج من المشكلة اللي بقالهم فيها كثير ومالهاش حل، كمان انت في عرضك سلطت الضوء على ميزه هتنفعهم لو واجهوا نفس المشكله دي بعدين، وهي ان الأملاح قليله فمش هيحسوا بالعطش لفترة طويلة، وبالتالي مش هيفضلوا يشتروا بتكلفة أعلى من اي احد لانهم لقوا عندك المميزات الاقتصادية الموفرة ليهم والمفيده كمان.