بتقدم محتويات هادفة ومواضيع شيقة بس مش لاقي اهتمام؟
طيب عايز يكون في اهتمام بالبريد الإلكتروني؟
مش عارف تجذب الاهتمام وحاسس إن مجهودك محدش بيقدره ومُهمل؟
في المقال ده هنتكلم عن:
- تركات بسيطة بس مؤثرة.
- طريقة لتحسين الانطباع الأولي عند الناس.
- ازاي تحط عناوين جذابة.
- شخصيتك في الرسائل.
لما بيكون المحتوى هادف وشيق ومصروف عليه من حيث التكلفة المادية أو الطاقة الجسدية لازم تكون منتظر اهتمام من الناس، ولكن للأسف الاهتمام ده مش هيجي غير لما تحط لمسات بسيطة تحت شروط معينة،
وده مش عشان خاطر هم بيهملوك لوحدك أو لـعيب فيك وفي محتواك ولكن مع التقدم وانتشار التواصل من خلال البريد الإلكتروني وإنه بقي مربوط بكل التطبيقات تقريبا فأصبح في شروط للأولوية والاهتمام وده اللي هكلمك عليه النهارده.
تركات بسيطة بس مؤثرة
ممكن يكون فيه مجهود جبار في صناعة المحتوى أو الحاجة اللي بتتقدم ولكن اللمسات الأخيرة مش بتكون مميزة أو جذابة، وده للأسف غلط كبير وفئة كبيرة من الناس بتقع فيه، عشان كده لازم يكون فيه جهد مدخر، عقلي وبدني، عشان يحط عنوان مناسب للبريد الإلكتروني.
لأن زي ما الجواب بيبان من عنوانه فالاهتمام بمضمون الرسالة وخصوصا لو بين ناس لسه أول مرة بيتعاملوا مع بعض بيعتمد على أهمية وقيمة عنوان البريد أو الرسائل المبعوتة،
وكمان ممكن تستخدم عامل الإبهام عشان تجذب الانتباه وتخلي فيه علامة استفهام وفضول بحيث يكون ليك الأولوية في قراءة بريدك الإلكتروني.
كمان لازم تفهم أن الحياة فيها مشاكل كثير واللي انت باعت له البريد ده ممكن يكون فيه أكتر من حاجه شغالاه ومش مستعد انه يقرأ أي بريد إلكتروني لأي سبب غير محدد ممكن يكون ضغط شغل مثلاً،
فلو أول مرة تتعامل معاه لازم تكون حاطط عنوان صريح ومضمون بسيط ومهم وفي نفس الوقت يكون في تقدير لقيمة الوقت عندك وعند غيرك، وتحسب بدون مبالغة إذا كان أتأخر عليك في القراءة والرد ولا لا.
طريقة لتحسين الانطباع الأولي عند الناس
الضغوط النفسية اللي بتواجهك بتواجه غيرك، عشان كده لازم تبص لنفسك أن لو انت مكان الشخص اللي بيتقدم لك محتواه وعايز منك الاهتمام بالبريد بتاعه ايه الحاجات اللي هتسبب ده، غير أن المضمون يكون جذاب في حد ذاته وفي نفس الوقت البريد اللي انت هتبعتهم ليه عنوان صريح ومباشر و هيحط في عقل اللي قدامك علامة استفهام كبيرة.
عشان كده أفضل طريقة لتحسين الانطباع اللي المخاطب هياخده عنك وبناءً عليه هتلاقى رد فعل إيجابي أو سلبي هي البساطة، يعني مثلا لو قدمت محتوى عبارة عن فيديو وليكن شرح لطريقة التعامل مع برنامج مثلا،
فـ زي ما بتدعم الفيديو بكل وسائل الجذب من صور أو مؤثرات صوتية أو الاستعانة بكتابة مصطلحات مهمة أثناء الشرح، فبرده ممكن تسيب جزء مهم من كلامك مبهم وجذاب بحيث إن أنت تثير دافع الفضول وشغف المعرفة عند الطرف الثاني،
كمان ممكن تستخدم التكنولوجيا دي في إنك تربط الصور أو الشيء المعروض بـلينك يفتح تلقائياً عند أي لمسة، وده بيخلي فرصة الدخول للبريد بتاعك أكثر وأسرع.
ازاي تحط عناوين جذابة
الموضوع على قد بساطته على قد ما هو معتقد بالنسبة لناس كثير وفي الجانب الآخر فهو لب الموضوع، لأن يكون لك الأولوية لو الطرف الثاني حاسس بالاحترام في التعامل والاحترام ده بيكون في أنك تكون صريح وواضح وصادق في الكلام اللي بتوجهه،
كمان لازم تكون متحري الدقة في كتابة المضمون اللي هتبعته، بالإضافة إلى تصحيح لغوي دقيق للمضمون اللي هتكتبه، سواء كان باللغة العربية أو الإنجليزية، وده عشان تبين مدى ثقافتك وتعليمك ومستوى ذكائك ومهنيتك عند الطرف الثاني،
وده يعتبر رؤية مستقبلية عن الاستثمار والفائدة اللي هيلاقيها لو أتعامل معك وأنك مش هتكون بتضيع وقته.
لو حابب تعرف ازاي تحط عنوان مميز؟!، فهقولك لازم يكون مقتبس وبيدي إيحاء بأهمية الموضوع ويكون في كلمات مفتاحية مميزة، أو كلمات مش تقليدية يعني متستخدمش جمل تعبيرية محفوظة للناس كلها زي “نحيط سيادتكم علمًا” أو “نرجوا معرفة كذا”، وده لو حاجة جديدة عليك أو عندك مشكلة في الكتابة ، ممكن تطلب من حد غيرك يكتب لك المضمون.
كمان لازم يكون فيه كلمات تدل على عروض ومفاجآت مجانية، وممكن تستغل النقطة دي بشكل أوسع، يعني تشير في الفيديو لأهمية العروض اللي في هتكون فيها فايدة كبيرة لما يفتحوا رسائل البريد الإلكتروني بتاعتك، أو تطويع التكنولوجيا في إضافة لينك مربوط بالبريد بتاعك، وفيه برامج كتيرة تقدر تعمل ده بكل سهولة وفيه ناس متخصصة في المجال ده.
شخصيتك في الرسائل
زي ما بتهتم بشكل هدومك وريحتك وأنت رايح تقابل شخصية عامة أو أي مشوار مهم عشان تجذب الانتباه وتسيب طابع نفسي جميل عند اللي قدامك، لازم تهتم وتعرف إن رسايلك جزء من شخصيتك وكيانك الإعلامي اللي انت بتقدمه،
لازم يكون دايما فيه شغف وانتظار لمضمون محتوى الرسالة اللي هتقدمها أو هتبعتها للطرف التاني، وده بيديك ثقة في نفسك وتجربه أحسن تفيدك أن أنت تكتسب عملاء جداد ويكون في أولوية لقراءة رسايلك،
وده لأن كل ما تنجح أنك تتقدم في شغلك كل ما ده بيعمل لك دعايا ف بيخلي الرسائل بتاعتك توصل ويكون في انتظار لقراءتها والتعامل معاك.
طيب ليه بنقول إن شخصيتك بتبان من رسالتك؟!،
لأن زي بالضبط ما شخصيتك بتبان من استايل لبسك وطريقة كلامك، رسالتك هي الوسيلة الوحيدة للاتصال الابتدائي لأي عمل تجاري ناجح عشان كده لازم يكون مربوط بدوافع ثقة بالنفس وكيان إعلامي واعد عشان تقدر تحقق الديل الناجح اللي بتتمناه،
وده ينعكس على طريقة كلامك وتفكيرك فيما بعد، وفيه كثير من الناس بيحبوا يستخدموا طابع الإلحاح عشان الرسائل بتاعتهم يترد عليها بسرعة، ودي طريقه قد تكون مجدية لبعض الناس،
ولكن فيه نوع من الأشخاص وفئة كبيرة جدا كمان لا يستهان بها مش بتفضل النوع ده من التعامل وبتعتبر إن ده فضول غير مرغوب فيه بالمرة، فبيكون التجاهل مقصود أو بتمسح الرسائل أو تأرشفها لحين إشعار آخر.
عشان كده لو الرسايل بتاعتك بتتأخر في إنها تدي انطباع كويس وقبول عند الناس لازم تراعي المحتوى المميز والأسلوب الكويس ، وتستخدم أفضل الكلمات وتراعي عدم وجود أي غلطات كتابيه ولو بسيطة لأن ده من احترام العميل لنفسه ولغيره قبل أي حاجة.
